Nëse keni ndërruar vendbanim apo keni mbyllur përkohësisht biznesin tuaj, dhe si rezultat keni pasivizuar llogarinë tuaj në KESCO, të njëjtën mund ta ri-aktivizoni nëse e njëjta llogari ka qëndruar e pasivizuar për jo më gjatë se 24 muaj.

Nëse koha që një llogari ka qëndruar pasive është më e gjatë se 24 muaj, atëherë ju duhet ta ndiqni procedurën e njëjtë me atë për Lidhje të Reja, megjithëse për kërkesat e tilla nuk do të aplikohet tarifa e kyçjes.

Ndërsa, ri-aktivizimi i llogarisë tuaj në KESCO brenda afatit të paracaktuar kohor, bëhet duke bërë kërkesë në sportelet e Shërbimit për Konsumatorë, në zyrat e KESCO-s në distriktin tuaj.

Për ta bërë këtë kërkesë ju duhet të:

• Të paraqiteni në sportelet e Shërbimit për Konsumatorë.
• Të keni me vete një dokument identifikues, si dhe autorizimin noterial nëse aplikoni për dikë tjetër.
• Plotësoni formën e kërkesës, duke shënuar qartë shifrën konkrete të llogarisë që dëshironi ta aktivizoni dhe dorëzojeni këtë formë në sportelet e KESCO-s.
• Në rastet kur ka ndërrim të emrit nga emri i mëparshëm, aplikohen kushtet e njëjta sikurse te kërkesat për ndërrimin e emrit.

Vini re, se nëse llogaria që doni ta aktivizoni gjendet në emrin e një personi që ka ndërruar jetë, atëherë ju duhet ta sillni certifikatën e vdekjes të atij personi, si dhe certifikatën personale të personit që aplikon, përmes së cilës vërtetohet se ju jeni trashëgimtar.

Aktivitetet në terren që ndërlidhen me aktivizimin e llogarisë kryhen nga ana e Operatorit të Sistemit ndërsa, implementimi i të dhënave në databazë dhe njoftimi i konsumatorit për statusin e kërkesës bëhet nga ana e KESCO-s.

Pas dorëzimit të kërkesës tuaj, ajo do të analizohet nga ekspertët përkatës dhe nëse konstatohet se janë përmbushur kushtet konform rregulloreve në fuqi, ekipi i operimeve në terren udhëzohet ta instalojë njehsorin në lokacionin tuaj.

Aktivizimi i llogarisë tuaj do të zgjasë jo më shumë se 30 ditë nga momenti që keni bërë kërkesën në sportelet tona.

Ndërsa shpenzimet përkatëse do t’ju faturohen së bashku me faturën e parë të shpenzimit të energjisë elektrike të marrë nga konsumatori.

Urime! Llogaria juaj tanimë është aktivizuar dhe ju mund të filloni të konsumoni energji elektrike!